chashm-e-nam le ke chalo qalb-e-tapan le ke chalo
ek patthar ke liye sho.ala-e-jan le ke chalo
shayad us ko bhi shab-e-hijr nazar aa jaa.e
apni palkon pe charaghon ka dhuan le ke chalo
us ko chaha hai to phir sang-e-malamat bhi chuno
phuul toḌe hain to ab koh-e-giran le ke chalo
be-haqiqat hain vahan la.al-o-gohar shams-o-qamar
dushman-e-jan ke liye tohfa-e-jan le ke chalo
ek baar aur use dekh luun marte marte
mera qatil hai kahan mujh ko vahan le ke chalo
us ke honTon se chura lo koi rangin sa ḳhvab
us ki zulfon se koi abr-e-ravan le ke chalo
‘nur’ dar-pesh hai ab tum ko ḳhizaon ka safar
us ke aariz se baharon ka saman le ke chalo
Leave a Reply