Akram Naqqash
hairat se dekhta hua chehra kiya mujhe
sahra kiya kabhi kabhi dariya kiya mujhe
kuchh to inayaten hain mire karsaz ki
aur kuchh mire mizaj ne tanha kiya mujhe
pathra ga.i hai aankh badan bolta nahin
jaane kis intizar ne aisa kiya mujhe
tu to saza ke ḳhauf se azad tha magar
meri nigah se koi dekha kiya mujhe
ankhon men ret phail ga.i dekhta bhi kya
sochon ke iḳhtiyar ne kya kya kiya mujhe
Leave a Reply