Sabiha Sumbul
miri zindagi ki kitab ka hai har ik varaq yuun saja hua
kahin ansuon se likha hua kahin shoḳhiyon se bhara hua
miri arzuon ki titliyan ye masal ke kaun chala gaya
miri jannaten kahan gum huiin mire ḳhvab-zaron ka kya hua
vahi rang-o-nur ki barishen vahi phuul hain vahi ḳhushbuen
mire ham-safir kahan ga.e mire ham-jalison ka kya hua
kahin gum na ho ye rusum men kahin kho na jaa.e hujum men
ye miri jabin-e-niyaz par jo hai ek sajda saja hua
tiri qurbaten tiri chahatin sabhi nafraton men badal ga.iin
main to ibtida se thi bevafa vo tiri vafaon ka kya hua
mujhe gudgudata hai aaj bhi tire ghaur-o-fikr ka silsila
vo sharir ankhen jhuki jhuki vo qalam labon men daba hua
koi raushni ki ramaq nahin na koi dhuen ka nishan hai
ye diya bhi ‘sumbul’ ajiib hai na jala hua na bujha hua
Leave a Reply