mumtaz-mirza

Mere Nalon Mein Itna To Asar Hai

mire nalon men itna to asar hai

shab-e-gham hai magar kuchh mukhtasar hai

ummiden laae the gham le ke uthe

ye rudad-e-hayat-e-mukhtasar hai

nahin hai duur kuchh manzil hamari

zamana raah men haail magar hai

asiron ko rihai mil to jaae

magar shart-e-shikast-e-bal-o-par hai

vo rahen jin ko suuna kar gae vo

unhin par aaj tak meri nazar hai

jahan tum ho vahan hain laala o gul

jahan ham hain vahan barq-o-sharar hai

badal Daala hai jis ne mera aalam

kisi ki ik nigah-e-mukhtasar hai

ilahi khair mere ashiyan ki

saba ke saath phir mauj-e-sharar hai

mah o khurshid ko samjha hai manzil

khudaya kis qadar aajiz bashar hai

More Poems

Leave a Comment