aankhon men muravvat tiri ai yaar kahan hai
puchha na kabhu mujh ko vo bimar kahan hai
nau khat to hazaron hain gulistan-e-jahan men
hai saaf to yuun tujh sa numudar kahan hai
aram mujhe saya-e-tuba men nahin hai
batlao ki vo saya-e-divar kahan hai
laao to lahu aaj piyun dukhtar-e-raz ka
ai muhtasibo dekho vo murdar kahan hai
furqat men us abru ki gala katunga apna
myaan diijo use dam miri talvar kahan hai
jin se ki ho marbut vahi tum ko hai maimun
insan ki sohbat tumhen darkar kahan hai
dekhun jo tujhe khvab men main ai mah-e-kanan
aisa to mira tala-e-bedar kahan hai
sunte hi us avaz ki kuchh ho gai vahshat
dekho to vo zanjir ki jhankar kahan hai
din chhine vo jab dekhiyo gharat-gari us ki
tab sochiyo khurshid ki dastar kahan hai
us din ke huun sadqe ki tu khinche hue talvar
ye puchhta aave vo gunahgar kahan hai
hanste to ho tum mujh pe va-lekin koi din ko
roo.ge ki vo mera giraftar kahan hai
ai gham mujhe yaan ahl-e-taayyush ne hai ghera
is bhiid men tu ai mire gham-khvar kahan hai
jab tak ki vo jhanke tha idhar mahr se ham to
vaqif hi na the mahr par anvar kahan hai
us mah ke sarakte hi ye andher hai ‘ehsan’
maalum nahin rakhna-e-divar kahan hai
Leave a Reply