afzal-minhas

Gir Pada Tu Aakhiri Zine Ko Chhu Kar Kis Liye

gir pada tu akhiri ziine ko chhu kar kis liye

aa gaya phir asmanon se zamin par kis liye

aina-khanon men chhup kar rahne vaale aur hain

tum ne hathon men utha rakkhe hain patthar kis liye

main ne apni har masarrat dusron ko bakhsh di

phir ye hangama bapa hai ghar se bahar kis liye

aks padte hi musavvir ka qalam tharra gaya

naqsh ik ab-e-ravan par hai ujagar kis liye

ek hi fankar ke shahkar hain duniya ke log

koi bartar kis liye hai koi kam-tar kis liye

khushbuon ko mausamon ka zahr piina hai abhi

apni sansen kar rahe ho yuun moattar kis liye

itni ahmiyat ke qabil to na tha mitti ka ghar

ek nuqte men simat aaya samundar kis liye

puchhta huun sab se afzal koi batlata nahin

bebasi ki maut marte hain sukhan-var kis liye

More Poems

Leave a Comment