jab kabhi bhi is jahan se ruḳhsati mujh ko mile
qabl is se ai ḳhuda kuchh zindagi mujh ko mile
main to zinda huun andheron par so mujh ko hai ye Dar
mar na ja.un main agar kuchh raushni mujh ko mile
umr bhar main apne aansu ab-surat pi sakun
chahta huun is tarah ki tishnagi mujh ko mile
ik zara dekhe se mere nafraten ho jaa.en ḳhatm
mil sake mujh ko to ye jadugari mujh ko mile
jaisa bahar se ho vaisa hi vo andar se bhi ho
kaash is duniya men aisa aadmi mujh ko mile
kyon miri qismat men us ne dard-o-gham kuchh kam likhe
puchh lunga main ḳhuda se gar kabhi mujh ko mile
Leave a Reply