Dekh Kar Kurti Gale Mein Sabz Dhani Aap Ki

dekh kar kurti gale men sabz dhani aap ki

dhaan ke bhi khet ne ab aan maani aap ki

kya taajjub hai agar dekhe to murda ji uthe

chain nefe ki Dhalak pedu pe aani aap ki

ham to kya hain dil farishte ka bhi kafir chhin le

tuk jhalak dikhla ke phir angiya chhupani aap ki

aa pade do sau baras ke murda-be-e-jan men jaan

jis ke uupar do ghadi ho mehrbani aap ki

chhalle ghairon paas to vo khatam-e-zar ai nigar

hai hamare paas bhi ab tak nishani aap ki

vaqt to jaata raha par baat baaqi rah gai

hai ye jhuti dosti ab ham ne jaani aap ki

kya ajab surat raqib-e-ru-siyah ki dekh kar

khauf se halat hui ho paani paani aap ki

ek aalam kohkan ki tarah sar phodega ab

gar isi surat rahi shirin-zabani aap ki

kya hamen lagti hai pyari jab vo kahti hai ‘nazir’

hai miyan kuchh in dinon na-mehrbani aap ki

Leave a Comment