Charagh-E-Shauq Jala Raat Ke Asar Se Nikal

Khawer Eijaz

charagh-e-shauq jala raat ke asar se nikal

safar na rok tilismat-e-rahguzar se nikal

kabhi to dast-e-hina.i se likh visal ki rut

kabhi to shisha-e-jan TuTne ke Dar se nikal

javaz DhunD na apni sada bikharne ka

hayat mohr-ba-lab dast-e-chara-gar se nikal

zara si vus.at-e-idrak men na gum ho ja

is imtihan se guzar hairat-e-ḳhabar se nikal

tire ḳhayal men huun shahr-e-raftagan tu bhi

kisi khanDar se ubhar aks-e-bam-o-dar se nikal

zakat-e-ḳhvab men de di hain main ne ankhen bhi

ab ai jahan-e-digar hita-e-nazar se nikal

nigah-e-zard men ug sabz ḳhvab ki konpal

gulab-e-shaḳh phir ujḌe hue shajar se nikal

bandhe hain shaam sutunon se sub.h ke taare

jamal-e-yar kisi naqsh-e-motabar se nikal

fasil-e-shahr pe aks-e-shab-e-ta.assuf hai

najat-e-gham ki kiran ḳhema-e-sahar se nikal