Main Wo Aatish-E-Nafas Hun Aag Abhi

main vo atish-e-nafas huun aag abhi

khirman-e-barq men laga dunga

rutho mujh se na vo bala huun main

roni surat ko bhi hansa dunga

tu uthae jo khanjar-e-pur-kham

gardan apni vahin jhuka dunga

aah se arsh ko hila dunga

kungar-e-charkh ko jhuka dunga

na chalo mujh se tum raqibon chaal

ungliyon par tumhen nacha dunga

vaqt rone ke ah-e-sozan se

daman-e-abr ko jala dunga

aage mere na shekhi maar ai shaikh

raat ka majra suna dunga

aah ko meri be-asar na kaho

main tamasha abhi dikha dunga

tum jo har rose kahte ho mar-mar

ek din mar ke bhi dikha dunga

dusre ko jo doge dil men bhi

dil ke naqsh-e-vafa mita dunga

shaikh chal to sharab-khane men

main tujhe aadmi bana dunga

‘mashriqi’ de agar vo jam-e-sharab

dil se gham main abhi mita dunga

Leave a Comment