bhaTak jaate hain rahbar rahbari men
kuchh aisi manzilen hain zindagi men
pata kaise mile us lapata ka
jo gum rahta ho apne aap hi men
ḳhabar-dar ai miri vahshat ḳhabar-dar
koi laghzish na ho divangi men
na yunhi be-ḳhudi men gum hai koi
nihan raz-e-ḳhudi hai be-ḳhudi men
farishte bhi samajhne se hain qasir
bashar kya hai libas-e-admi men
tumhen hai raushni par naaz lekin
nihan hai tirgi bhi raushni men
hasin taḳh.il ki paikar-tarashi
na ho ‘kausar’ to kya hai sha.eri men
Leave a Reply