kami zara si agar fasle men aa jaa.e
vo shaḳhs phir se mire rabte men aa jaa.e
use kured raha huun tarah tarah se ki vo
jihat jihat se mire ja.eze men aa jaa.e
kamal jab hai ki sanvre vo apne darpan men
aur us ka aks mire a.ine men aa jaa.e
kiya hai tark-e-ta.alluq to muḌ ke dekhna kya
kahin na farq tire faisle men aa jaa.e
dimagh ahl-e-mohabbat ka saath deta nahin
use kaho ki vo dil ke kahe men aa jaa.e
vo meri raah men ankhen bichha.e baiTha ho
ye vaqi.a bhi kabhi dekhne men aa jaa.e
vo mahtab-e-zamana hai log kahte hain
to us ka nuur mire shab-kade men aa jaa.e
bas ik ‘faragh’ bacha hai junun-pasand yahan
kaho ki vo bhi mire qafile men aa jaa.e
Leave a Reply