Murtaza Barlas
be-his o kaj-fahm o la-parva kahe
kal muarriḳh jaane ham ko kya kahe
is tarah rahte hain is ghar ke makin
jis tarah bahra sune gunga kahe
raz-ha-e-zabt-e-gham kya chhup saken
honT jab ḳhamosh hon chehra kahe
is liye har shaḳhs ko dekha kiya
kaash koi to mujhe apna kahe
hai takallum a.ina ehsas ka
jis ki jaisi soch ho vaisa kahe
paḌh chuke dariya qasida abr ka
kya zaban-e-ḳhushk se sahra kahe
bad-gumani sirf meri zaat se
main to vo kahta huun jo duniya kahe
Leave a Reply