chaman men dekh ghunchon ko javani apni yaad aa.i
fasana sun ke bulbul ka kahani apni yaad aa.i
jo dekhi nargis-e-bimar gulshan men to bas ham ko
bahut riqqat hui aur na-tavani apni yaad aa.i
suna kal dekhte hi aa.ine ko kya kahun tum se
mujhe bas aankh hai hai DabDaba.i apni yaad aa.i
chaman men chahchaha bulbul ka bas junhi suna ham ne
to bas yaron men ham ko sher-ḳhvani apni yaad aa.i
jo dekha hal-e-sham.a sub.h ham ne bazm men ja kar
to ham ko umr-e-be-huda ganvani apni yaad aa.i
saba ke chheḌ jo ham ne gulon se sub.h-dam dekhi
to us gul-ru se ham ko chheḌ-ḳhvani apni yaad aa.i
hua jaata hai siine men jo dil ḳhuun hamdamo shayad
kahin us shoḳh ko mehndi rachani apni yaad aa.i
hila.i jo saba ne zulf-e-pur-ḳham us pari-vash ko
to vo zanjir-e-dar ham ko hilani apni yaad aa.i
na puchho kuchh ki hangam-e-tamasha dekh dariya ko
mujhe kya kya tabi.at ki ravani apni yaad aa.i
ye tu ne ‘aish’ dekhi zulf-e-pechan kis ki jo tujh ko
pareshan-ḳhatiri ashufta-jani apni yaad aa.i
Leave a Reply