Asad Badayuni
rasta koi safar koi masafat koi
phir ḳharabi ki ata ho mujhe surat koi
saare dariya hain yahan mauj men apni apni
mire sahra ko nahin in se shikayat koi
jam ga.i dhuul mulaqat ke a.inon par
mujh ko us ki na use meri zarurat koi
main ne duniya ko sada dil ke barabar samjha
kaam aa.i na buzurgon ki nasihat koi
surma.i shaam ke hamrah parindon ki qatar
dekhne valon ki ankhon ko basharat koi
bujhti ankhon ko kisi nuur ke dariya ki talash
TuTti saans ko zanjir zarurat koi
tu ne har naḳhl men kuchh zauq-e-numu rakkha hai
ai ḳhuda mere panapne ki alamat koi
Leave a Reply