Aah Se Jab Dil Mein Dube Tir Ubhaare Jaenge

aah se jab dil meñ Duube tiir ubhāre jā.eñge

dekh lenā duur tak uḌ kar sharāre jā.eñge

mauj-e-tūfāñ ko jinhoñ ne chīrnā sīkhā nahīñ

is kināre se bhalā kyā us kināre jā.eñge

utnī hī rañgīn hotī jā.egī apnī nazar

jis qadar tere tasavvur ko sañvāre jā.eñge

kuchh na kuchh ho hī rahegā dard-mandī kā ma.aal

jaan ke dushman tujhī ko ham pukāre jā.eñge

ḳhaak ho kar bhī na aa.egā unheñ dam bhar qarār

uTh ke tere dar se jo aafat ke maare jā.eñge

ek harf-e-dil-nashīñ! ye bhī nahīñ to ik nigāh

duur jaane vaale kyūñ-kar be-sahāre jā.eñge

baiThe sāhil par ginā karte haiñ jo lahreñ ‘asar’

vaqt paḌne par bhalā kyā dhāre dhāre jā.eñge

Leave a Comment