aah se jab dil men Duube tiir ubhare ja.enge
dekh lena duur tak uḌ kar sharare ja.enge
mauj-e-tufan ko jinhon ne chirna sikha nahin
is kinare se bhala kya us kinare ja.enge
utni hi rangin hoti ja.egi apni nazar
jis qadar tere tasavvur ko sanvare ja.enge
kuchh na kuchh ho hi rahega dard-mandi ka ma.aal
jaan ke dushman tujhi ko ham pukare ja.enge
ḳhaak ho kar bhi na aa.ega unhen dam bhar qarar
uTh ke tere dar se jo aafat ke maare ja.enge
ek harf-e-dil-nashin! ye bhi nahin to ik nigah
duur jaane vaale kyun-kar be-sahare ja.enge
baiThe sahil par gina karte hain jo lahren ‘asar’
vaqt paḌne par bhala kya dhare dhare ja.enge
Leave a Reply