Farooq Muztar
qurbaten baḌh ga.i nigahon ki
ab haden ḳhatm hain libason ki
dhuup roke khaḌi hai kis ke liye
ye sar-e-rah qatar peḌon ki
aur phailega aag ka dariya
aur jhulsegi khaal chehron ki
ḳhud-kushi ka safar bhi sahl nahin
bhiiḌ si hai lagi savalon ki
kaun ḳhud men samo saka hai kabhi
vus.aten la-zaval lamhon ki
kab se dohra raha huun main ‘muztar’
ek fahrist chand namon ki
Leave a Reply