ḳhud tamasha ban ga.i chashm-e-tamasha.i ki bas
sang-e-dar par aaj ki hai vo jabin-sa.i ki bas
toḌ Daala main ne aḳhir us ka kaj-aks aa.ina
varna vo yuun tha ajab mahv-e-tamasha.i ki bas
aisa lagta hai ki bazm-e-naz men tanha huun main
chashm-e-bina ho to hai vo bazm-ara.i ki bas
zarre zarre ki zaban par naghma-e-jan-soz hai
dasht-zar-e-gham ne aisi ḳhaak chhanva.i ki bas
ajnabi lagne laga hai sub.h-e-ḳhandan ka jamal
yuun hui ruḳhsat miri ankhon ki bina.i ki bas
duur se jab sahil-e-ummid-o-yas aaya nazar
daf.atan ik mauj kashti se vo Takra.i ki bas
is qadar haibat-zada tha ahd-e-tark-e-dosti
avval avval to tabi.at aisi ghabra.i ki bas
ta.er-e-sidra bhi ḳha.if tha miri parvaz se
aa ke manzil ke qarib ik choT vo khaa.i ki bas
aaj tak ubhri nahin hai kashti-e-umr-e-ravan
ab-ju-e-dard men thi aisi gahra.i ki bas
main ki ḳhvab-e-naz men asuda shab hone ko tha
sur-e-israfil ki aisi sada aa.i ki bas
rafta rafta jal ke ḳhakistar hui aqlim-jan
chhaT ga.e badal magar phir dhuup vo chha.i ki bas
uqda-e-hairat ‘muzaffar’ jis ghaḌi khulne ko tha
zindagi ne kaan men vo baat batla.i ki bas
Leave a Reply