apni tanha.i ka saman uTha laa.e hain
aaj ham ‘mir’ ka divan uTha laa.e hain
in dinon apni bhi vahshat ka ajab aalam hai
ghar men ham dasht-o-bayaban uTha laa.e hain
vus.at-e-halqa-e-zanjir ki avaz ke saath
ham vo qaidi hain ki zindan uTha laa.e hain
mere sanson men koi gholta rahta hai alaav
apne siine men vo tufan uTha laa.e hain
ik na.e tarz pe abad karenge us ko
ham tire shahr ki pahchan uTha laa.e hain
zindagi ḳhud se mukarne nahin denge tujh ko
apne hone ke sab imkan uTha laa.e hain
ham ne nuqsan men imkan ko rakkha hi nahin
jitne mumkin the vo nuqsan uTha laa.e hain
kuchh to ‘shahid’ ko bhi nisbat rahi hogi us se
vo jo TuuTa hua gul-dan uTha laa.e hain
Leave a Reply