Waseem Tashif
avaza-e-ḳhayal kahin gunjta hua
aur us pe saara sahn-e-suḳhan jagta hua
dast-e-dua buland hua tha yahin kahin
apne liye ḳhuda se tujhe mangta hua
aḳhir men thak ke baiTh gaya ḳhushk ghaas par
phulon ke darmiyan tujhe DhunDhta hua
hairat hamari aankh ko lalkarti hui
manzar darun-e-ḳhvab koi dauḌta hua
logon ke saath saf men khaḌa ho gaya ‘vasim’
farz-e-kifaya men bhi ise janta hua
Leave a Reply