man ki mai ho to piyale nahin dekhe jaate
ishq ho jaa.e to chehre nahin dekhe jaate
main bigaḌte hue bachchon ko bhi kab DanTta huun
mujh se rote hue bachche nahin dekhe jaate
hamla-avar ko main ab ḳhud hi riyasat de duun
apne logon pe ye hamle nahin dekhe jaate
tairna aata hai to chhoḌ mujhe tu to nikal
mauqa aisa ho to va.ade nahin dekhe jaate
us ki ḳhamoshi andhere ka sabab banti hai
mujh se ab aur andhere nahin dekhe jaate
apne kashmiri labon se tu gira sharm ke band
Dubne vaqt kinare nahin dekhe jaate
main koi haath bhi thamun to ye dil thamta hai
mujh se qismat ke sitare nahin dekhe jaate
Leave a Reply