Poet
pae-gul-gasht suna hai ki vo aaj aate hain
phulon ki bhi ye khushi hai ki khile jaate hain
bahr-e-taskin-e-dil ahbab ye farmate hain
aap kahiye to abhi ja ke bula laate hain
gudgudi kar ke hansate hain jo ghash men ahbab
kis ke rumal se talve mire sahlate hain
aap ke hote kisi aur ko chahun tauba
kis taraf dhyan hai kya aap ye farmate hain
meri hi jaan ke dushman hain nasihat vaale
mujh ko samjhate hain un ko nahin samjhate hain
bulbulo baagh men ghafil na kahin ho jaana
har taraf ghaat men sayyad nazar aate hain
khuub pahchan liya ham ne tumhen dil de kar
sach kaha hai ki jo khote hain vahi paate hain
mujh ko bavar nahin sach sach ye bata de hamdam
tu ne kis se ye suna hai ki vo aaj aate hain
kya dil o diida bhi harkare hain subhan-allah
laakh pardon men koi ho ye khabar laate hain
dekh achchha nahin ‘jauhar’ kahin maail hona
jab bhi samjhate the ab bhi tujhe samjhate hain
Leave a Reply