fughan se tark-e-fughan tak hazar tishna-labi hai
sukut bhi to ik andaz-e-mudda.a-talabi hai
bahut dinon men hua ahl-e-arzu ko mayassar
vo qurb-e-ḳhas jahan teri yaad be-adabi hai
ḳhayal-e-tark-e-ta.alluq junun-e-qat-e-marasim
tamam sa.i-e-talab hai tamam tishna-labi hai
sukut-e-sho.ala-e-gul hai ki tera paikar-e-rangin
vo aanch aati hai jaise badan men aag dabi hai
usi ke faiz se ashob-e-agahi hai gavara
nigah-e-naz hai ya mauj-e-bada-e-unabi hai
na jaane kis tarah tai hoga tishnagan-e-karam se
vo marhala ki jahan arz-e-hal be-adabi hai
faza to naghma-e-gul se bhi chaunk uThi hai lekin
tiri shagufta-labi phir vahi shagufta-labi hai
Leave a Reply