ajal hoti rahegi ishq kar ke multavi kab tak
muqaddar men hai ya rab arzu-e-ḳhud-kushi kab tak
taḌapne par hamare aap rokenge hansi kab tak
ye mathe ki shikan kab tak ye abru ki kaji kab tak
kiran phuTi ufuq par aftab-e-sub.h-e-mahshar ki
suna.e jaao apni dastan-e-zindagi kab tak
dayar-e-ishq men ik qalb-e-sozan chhoḌ aa.e the
jala.i thi jo ham ne sham.a raste men jali kab tak
jo tum parda uTha dete to ankhen band ho jatin
tajalli samne aati to duniya dekhti kab tak
tah-e-girdab ki bhi fikr kar ai Dubne vaale
nazar aati rahegi sahilon ki raushni kab tak
kabhi to zindagi ḳhud bhi ilaj-e-zindagi karti
ajal karti rahe darman-e-dard-e-zindagi kab tak
vo din nazdik hain jab aadmi shaitan se khelega
khilauna ban ke shaitan ka rahega aadmi kab tak
kabhi to ye fasad-e-zehn ki divar TuTegi
are aḳhir ye farq-e-ḳhvajgi-o-bandagi kab tak
dayar-e-ishq men pahchanne vaale nahin milte
ilahi main rahun apne vatan men ajnabi kab tak
muḳhatab kar ke apne dil ko kahna ho to kuchh kahiye
‘saba’ us bevafa ke asare par sha.iri kab tak
Leave a Reply