hamari jiit hui hai ki donon haare hain
bichhaḌ ke ham ne ka.i raat din guzare hain
hanuz siine ki chhoTi si qabr ḳhali hai
agarche is men janaze ka.i utare hain
vo ko.ele se mira naam likh chuka to use
suna hai dekhne valon ne phuul maare hain
ye kis bala ki zaban asman ko chaaT ga.i
ki chand hai na kahin kahkashan na taare hain
mujhe bhi ḳhud se adavat hui to zahir hai
ki apne dost mujhe zindagi se pyare hain
nahin ki arsa-e-girdab hi ghanimat tha
magar yaqin to dilao yahi kinare hain
ghalat ki koi sharik-e-safar nahin ‘aslam’
sulagte aks hain jalte hue ishare hain
Leave a Reply