use ujāle kā ḳhatra satātā rahtā hai
pakaḌ pakaḌ ke vo jugnū bujhātā rahtā hai
duā.eñ detā hai koī na bhiik māñge yahāñ
magar vo chaak pe kaase banātā rahtā hai
havā pe zor to chaltā nahīñ hai jugnū kā
magar charāġh kī himmat baḌhātā rahtā hai
vo shaḳhs jis ko abhī tairnā nahīñ aatā
vo Dūbne ke favā.ed ginātā rahtā hai
ḳhamoshiyoñ se baḌā rabt thā jise ‘yāsir’
vo canvās pe chīḳheñ banātā rahtā hai