Khushbu Ko Rangton Pe Ubharta Hua Bhi dekh

Kishwar Naheed

khushbu ko rangton pe ubharta hua bhi dekh

naqsh-e-zar-e-bahar chamakta hua bhi dekh

rakh ke madar-e-shauq kisi aftab par

tu sang-e-intizar pighalta hua bhi dekh

ankhon ke gird jhankte halqe na dekh tu

sail-e-khajista-khu ko utarta hua bhi dekh

be-faiz dasht-e-dard men ahistagi ke saath

ahu-sarisht logon ko chalta hua bhi dekh

rang-e-hina ko naqsh-e-qadam se juda bhi kar

sahra men rakhsh-e-shauq ko girta hua bhi bhi dekh

mahsus kar chhalakte hue shauq ki jalan

yakh chandni men jism ko jalta hua bhi dekh

har chiiz de ke jaati hai apni nishaniyan

har gul men rang-e-subh jhalakta hua bhi dekh

‘nahid’ chira-e-dasti-e-yaran aziiz rakh

mauqe ke saath un ko badalta hua bhi dekh