Tariq Naeem
hava men aa.e to lau bhi na saath li ham ne
phir ek umr andheron men kaaT di ham ne
diye men zor bahut tha magar na jaane kyuun
bas ek had se na baḌhne di raushni ham ne
uTha uTha ke tire naaz ai gham-e-duniya
ḳhud aap hi tiri aadat ḳharab ki ham ne
vafa men jhuuT milaya dilon men khoT rakha
kuchh is tarah se nibha.i hai dosti ham ne
dua karo vo kisi dil-jale ki aah na ho
ufuq ke paas jo dekhi hai aag si ham ne
ajiib sehr tha dil ke qimar-ḳhane men
tab uTh ke aa.e ki hasti bhi haar di ham ne
qafas-misal thi ‘tariq’-na.im duniya bhi
asiir ho ke gizari hai zindagi ham ne
Leave a Reply