Kuldeep Kumar
mile bina hi bichhaḌne ke Dar se lauT aa.e
ajiib ḳhauf men ham us ke dar se lauT aa.e
na aise roiye nakami-e-mohabbat par
ḳhushi mana.iye zinda bhanvar se lauT aa.e
ye sochte hue baiThe hain raah men ruk kar
udhar to ga.e hi nahin the jidhar se lauT aa.e
lab us ke samne the aur ham ne chuma nahin
samajh lo paanv uThe aur dar se lauT aa.e
abhi to vaqt hai suraj ke Dubne men to phir
ye kya hua ki parinde safar se lauT aa.e
kisi bhi tarah ye duniya na chhoḌ paa.e ham
ki jab bhi nikle tiri rahguzar se lauT aa.e
phir us ne dekha koi taara TuTte ik raat
phir ek roz musafir safar se lauT aa.e
lagengi aur bhi tarkib us ko laane men
koi zaruri hai samjhane bhar se lauT aa.e
ye kis ki dhun thi jo divar-o-dar na pahchana
ye kis ḳhayal men apne hi ghar se lauT aa.e
mire guzarne ki afvah hi uḌa de koi
kise ḳhabar ki vo jhuTi ḳhabar se lauT aa.e
Leave a Reply