Lahu Hi Kitna Hai Jo Chashm-E-Tar Se Niklega

Faza Ibn E Faizi

lahu hi kitna hai jo chashm-e-tar se niklega

yahan bhi kaam na arz-e-hunar se niklega

har ek shaḳhs hai be-samtiyon ki dhund men gum

bata.e kaun ki suraj kidhar se niklega

karo jo kar sako bikhre hue vajud ko jama

ki kuchh na kuchh to ghubar-e-safar se niklega

main apne aap se mil kar hua bahut mayus

ḳhabar thi garm ki vo aaj ghar se niklega

hain barf barf abhi mere ahd ki raten

ufuq jalenge to shola sahar se niklega

ye kya ḳhabar thi ki ai ranj-e-ra.egan-nafsi

dhuan bhi sina-e-ahl-e-nazar se niklega

miri zamin ne ḳhala men bhi khinch di divar

tu asman sahi kis rahguzar se niklega

tamam log isi hasrat men dhuup dhuup jale

kabhi to saaya ghanere shajar se niklega

samo na taron men mujh ko ki huun vo sail-e-nava

jo zindagi ke lab-e-mo’tabar se niklega

phira huun kaasa liye lafz lafz ke pichhe

tamam umr ye sauda na sar se niklega

‘faza’ mata-e-qalam ko sambhal kar rakkho

ki aftab isi durj-e-guhar se niklega