asar aah ka gar dikhaenge ham
abhi khinch kar tum ko laenge ham
zara rah tu ai dasht-e-avargi
tira ḳhuub ḳhaka udaenge ham
fasana tiri zulf-e-shab-rang ka
badhega jahan tak badhaenge ham
vahi dard-e-furqat vahi intizar
bhala mar ke kya chain paenge ham
vo gumrah ghairon ke hamrah hai
use raah par kyuun ki laenge ham
qafas se hua izn-e-parvaz kab
ye ḳhvahish hi dil se udaenge ham
tilism-e-mohabbat hai ashiq ka haal
unhen bhi ye qissa sunaenge ham
vo naḳhvat se hain asman se pare
kahan se unhen DhunDh laenge ham
na kar aah ye shorish-afzaiyan
tujhe bhi kabhi azmaenge ham
na tutega sar-rishta-e-iḳhtilat
vo khinchenge jitna badhaenge ham
ye maana ki ho rashk-e-hur-o-pari
magar adamiyat sikhaenge ham
hazar tir-e-mizhgan ki bochhad se
ye ik dil kahan tak bachaenge ham
hamen zahr-o-ḳhanjar ki kyuun hai talash
shab-e-gham men kya mar na jaenge ham
na nikla koi Dhab to ban kar ghubar
nazar men tumhari samaenge ham
kahan ghar men muflis ke farsh-o-farosh
vo aae to ankhen bichhaenge ham
tire qad se ki sarv ne ham-sari
use aaj sidha banaenge ham
nahin ghusl-e-mayyat ki ja qatl-gah
magar ḳhak-o-ḳhun men nahaenge ham
rah-e-ishq se na-balad hai abhi
ḳhizar ko ye rasta bataenge ham
hua vasl bhi to maza kaun sa
vo ruthenge har dam manaenge ham
shab-o-roz dil ko kureden na kyuun
yahin se pata us ka paenge ham
abas hai ye ‘majruh’ tul-e-amal
bakhede ye sab chhod jaenge ham