Poet
mira dayar shanasa-e-rang-o-nur nahin
agarche shams-o-qamar is nagar se duur nahin
jamal-o-paikar-o-andam ki ghaTa.en hain
kisi bhi dil pe tajalli-e-koh-e-tur nahin
ḳhuda se ishq ki pahli hasin nishani hai
vo ik namaz ki jis men ḳhayal-e-hur nahin
hijab-e-mahmil-e-laila ko tu uTha na saka
ki teri aankh men didar ka shu.ur nahin
nisab-e-nab-e-husaini miri tamanna hai
ḳhitab-e-va.iz-o-darvesh men surur nahin
kusha-e-raz aza-e-husain kaise ho
tumhare qalb men rasiḳh mira zabur nahin
gham-e-husain men rota hai la nahin kahta
vo jis ka jism adu ke tabar se chuur nahin
charagh ban ke andheri ruton men jalta huun
siva.e is ke mira aur kuchh qusur nahin
tulu-e-nur hai ‘naqqash’ sher-e-agahi
ai va-e-baḳht isi sher ko zuhur nahin
Leave a Reply