kis saliqe se vo mujh men rat-bhar rah kar gaya
shaam ko bistar sa khola sub.h ko tah kar gaya
vaqt-e-ruḳhsat tha hamare bahar andar itna shor
kuchh kaha tha us ne lekin jaane kya kah kar gaya
qatl hote sab ne dekha tha bhare bazar men
ye na dekha ḳhuun mira kis ki taraf bah kar gaya
Dubna hi tha so Duuba chand us ke vasl ka
raat ko lekin hamesha ki shab muhayya kar gaya
sirf miTTi ho ke rahne men tahaffuz hai yahan
jis ne koshish ki makan hone ki bas Dhah kar gaya
chaal jab bhi mil nahin paa.i zamin ki chaal se
kaisa kaisa sar-buland aaya tha aur Dhah kar gaya
dukh ka a.ina ulaT deta hai har ‘ehsas’ ko
ḳhush gaya itna hi koi jitne dukh sah kar gaya
Leave a Reply