fariyad bhi main kar na saka be-ḳhabari se
dil khinch liya us ne kamand-e-nazari se
us but ko kiya raam na soz-e-jigri se
naale mire badnam hue be-asari se
kab dil pe asar karta hai zalim ka tamalluq
milte hain kahin zaḳhm-e-jigar baḳhiya-gari se
hai saya-fagan taaza nihal-e-chaman-e-husn
nisbat mire dil ko hai aqiq-e-shajri se
uḌ jaate tere hosh mire naghmon se bulbul
kar shukr ki majbur huun be-bal-o-pari se
har lutf se ḳhali hai farogh-e-dam-e-piri
raushan hua ye nuur charagh-e-sahari se
daman ki kali bad-e-saba khol sake kab
satir nahin Darte hain kabhi parda-dari se
ulfat ka shajar sarv-qadon ki hai hari shaḳh
ushshaq ko bavar hua ye be-samari se
kahte hain vo sun kar ḳhabar-e-rehlat-e-ushshaq
jaldi gaya kahna tha hamen kuchh safari se
hon laakh ḳhatar kucha-e-dilbar na chhuTega
uTh sakti hai zillat bhi kahin mard-e-jari se
nafrat nahin lazim tujhe zalim evaz-e-rahm
baiTha huun main dil kho ke tiri hila-gari se
aamil karen ik baar agar band to mai-kash
ḳhali karen sau martaba shishe ko pari se
kar dete hain yuun harza-dara ko kamla-band
lab zaḳhm ke jis tarah milen baḳhiya-gari se
aghyar hue kab miri nakami ka baa.is
mahrumiyan paida huiin ashufta-sari se
kar ghair ko apna ki muradon ka nishan de
bekar vo paikan hai juda ho jo sari se
a.amal-e-‘habib’-e-jigar-afgar ki kashti
sahil pe pahunch ja.egi ashkon ki tari se
Leave a Reply