fikr ko ḳhvab ḳhayalat ko faani likhna
zindagi aankh chura.e to kahani likhna
shaḳh pe phuul khile hon bhi to kuchh farq nahin
tum baharon ko bhi ab daur-e-ḳhizani likhna
yuun bhi ho ja.egi tasnif mukammal yaaro
kuchh rivayat se kuchh apni zabani likhna
chand likhna to nigahon men ho chehra us ka
chandni barse to maujon ki ravani likhna
ḳhat ba-har-hal rahe ba.is-e-taskin ‘asad’
koi mausam ho yahan shaam suhani likhna
Leave a Reply