danishvaron ke bas men ye radd-e-amal na tha
main aisi tegh le ke uTha jis men phal na tha
kya dard TuuT TuuT ke barsa hai raat bhar
itna ghubar to mire chehre pe kal na tha
pathrav kar raha hai vo ḳhud apni zaat par
kya dil ke mas.ale ka koi aur hal na tha
shaḳhen ladi hui thiin to patthar na tha nasib
patthar paḌe mile to daraḳhton men phal na tha
shab ki hava se haar ga.i mere dil ki aag
yaḳh-basta shahr men koi radd-o-badal na tha
ab ek ek harf se chhanti hai raushni
tum se mile na the to ye husn-e-ghazal na tha
‘qaisar’! zamir-e-vaqt ko dekha kured ke
sadiyan rakhi thiin dosh pe muTThi men pal na tha
Leave a Reply