Karta Hai Bekar Ki Baaten Kaam Ki Koi Baat Nahin

karta hai bekar ki baten kaam ki koi baat nahin

ghairon jaisi baat hai teri apnon jaisi baat nahin

jaam sabhi ke hathon men hai haath hamare ḳhali hain

khullam-khulla na-insafi saaqi achchhi baat nahin

mahfil men jis ko bhi dekho ruTha ruTha lagta hai

kaḌvahaT hai avazon men koi miThi baat nahin

kalima tera sapna tera fikr tiri aur tera ḳhayal

sirf tiri hi baat zaban par aur kisi ki baat nahin

kahne ko to kah di tu ne apne dil ki saari baat

sachcha.i hai lekin ye ki ye bhi saari baat nahin

kaise milen ham tum se yaaro kaise bula.en ghar apne

gham hi gham hain paas hamare koi ḳhushi ki baat nahin

na-insafi har janib hai har su zulmat hi zulmat

dekh ke ye sab kyuun sab chup hain kahte haq ki baat nahin

pahle kya kya kuchh kah Daala phir ye kah kar saaf ga.e

kar Daali hai bhuul zaban ne sochi-samjhi baat nahin

tere liye hi jiita huun aur tere liye hi marta huun

munh dekhi ‘javed’ hain baten dil se nikli baat nahin