gul muraqqaa hain tire chaak garebanon ke
shakl maashuq ki andaz hain divanon ke
na rukenge dar-o-divar se zindanon ke
khud-bakhud paanv uthe jaate hain divanon ke
peng vahshat men badhe hain tire divanon ke
ab bayaban bhi unhen sahn hain zindanon ke
ek kya jin ke har ik zarre men gum hon sau hashr
ham bagule bane aise kai maidanon ke
kaaba-o-dair men hoti hai parastish kis ki
mai-parasto ye koi naam hain mai-khanon ke
kuchh is andaz se aa baithe hain vo shama ke paas
dekh kar duur se par jalte hain parvanon ke
le gaya aap ke divanon ko sauda-e-bahar
dar-o-divar hain tuute hue zindanon ke
jaam hai tauba-shikan tauba miri jam-shikan
samne dher hain tuute hue paimanon ke
haath kyuun khinch liya pher ke khanjar tu ne
sar jagah se nahin uthte hain giran-janon ke
dar se badhne nahin deta hai mujhe zauq-e-sujud
main huun naqsh-e-kaf-e-pa hain tiri darbanon ke
nahin ginti main magar bazm-e-sukhan hai raushan
aaj main shama huun majmea men sukhan-danon ke
qatre hain kausar-o-tasnim kaf-e-saqi men
khum-e-aflak to paimane hain mai-khanon ke
vusat-o-zat men gum vahdat-o-kasrat hai ‘riyaz’
jo bayaban hain vo zarre hain bayabanon ke
vaah kya nama-e-aamal hain divanon ke
ki farishte liye tukde hain garebanon ke
hosh udte hue dekhe nahin insanon ke
lutf mai-khanon men aate hain pari-khanon ke
naqsh-e-pa rah nahin sakte tire divanon ke
ai junun sahn bahut tang hai zindanon ke
par-e-parvaz bane khud sharar-e-shama kabhi
sharar-e-shama bane par kabhi parvanon ke
apne kuche men jo dekha to vo hans kar bole
chhanne vaale kahan aae bayabanon ke
zikr kya ahl-e-junun ka ki jab aati hai bahar
vo to vo rang badal jaate hain zindanon ke
aaj but baithe hain taqdir ke malik ban kar
ab jo likkha ho muqaddar men musalmanon ke
baam tak tere zariya hai rasai ki yahi
duur se jhuk ke qadam luun tire darbanon ke
un ke bikhre hue gesu nahin hatte rukh se
aaj nikle hain vo jhurmut men nigahbanon ke
saath valon men mire kohkan-o-qais bhi hain
mere qisse nahin tukde koi afsanon ke
chashm-e-yaqub bane halqa-e-zanjir ki aankh
kabhi taqdir se din phirte hain zindanon ke
ghairat-e-haq ko ho kya josh jab aamal ye hain
kam hai jo kuchh ho muqaddar men musalmanon ke
duur se dekh ke phirna vo mira ulte paanv
uf vo badle hue tevar tire darbanon ke
mah-o-anjum se tapakta hai yahi raton ko
un men tuute hue saghar bhi hain mai-khanon ke
inhen thukrate chalo hashr men lutf aaega
inhin qabron men hain maare hue armanon ke
nikli jaati hai zamin paanv ke niche se ‘riyaz’
kyuun dua ko na uthen haath musalmanon ke
Leave a Reply