ukta ke ku-e-yar se ushshaq chal paḌe
kar-e-vafa ke dekhiye mushtaq chal paḌe
main uTh gaya to dard ki mahfil ujaḌ ga.i
mere hi saath ishq ke mashshaq chal paḌe
naqsh-e-qadam paḌe hain ye qudrat ke ja-ba-ja
duniya-e-dil se uTh ke bad-aḳhlaq chal paḌe
barg-e-hina se likh ke nasihat zamin par
gulshan ko tere chhoḌ ke auraq chal paḌe
rishton ke ehtiram ki jin ko na thi tamiz
daman men apne bandh ke afaq chal paḌe
teri nigah-e-naz ne aisa fusun paḌha
divane ho ke duniya se ashfaq chal paḌe
main ne charagh-e-ishq jala.e the jo ‘nadim’
hamrah mere chhoḌ ke sab taaq chal paḌe
Leave a Reply