qaid aur qaid bhi tanha.i ki
sharm rah jaa.e shakeba.i ki
sujhta kya hamen un ankhon se
shart thi qalb ki bina.i ki
dar-e-but-ḳhana se baḌhne hi na paa.e
garche ik umr jabin-sa.i ki
qais ko naqa-e-laila na mila
go bahut badiya-paima.i ki
ham ne har zarre ko mahmil paaya
hai ye qismat tire sahra.i ki
vaqf hai us ke liye jan-e-aziz
kaabe ke ḳhadim o shaida.i ki
kaaba o quds men ghar kiya ye bhi
ik ada hai mire harja.i ki
nazar aaya hamen har chiiz men tu
us pe ye dhuum hai yakta.i ki
ishq aur jaur-e-sitamgar ka gila
had hai ai dil yahi rusva.i ki
ishq ko ham ne kiya nazr-e-junun
umr bhar men yahi dana.i ki
kar ga.i zinda-e-javed hamen
tegh-e-qatil ne masiha.i ki
ho na taqlid dila maqtal men
kahin muusa se tamanna.i ki
na sahi tegh tajalli hi sahi
aankh jhapke na tamasha.i ki
kal ko hai phir vahi zindan ‘jauhar’
Thiik kiya aap se sauda.i ki
Leave a Reply