is samay koi nahin meri nigahbani par
ye ghaḌi saḳht kaḌi hai tire zindani par
ba-ḳhabar kar ke rah-e-ishq ki mushkil se tujhe
faisla chhoḌ diya hai tiri asani par
na hava aur na miTTi pe kabhi ho paaya
jo bharosa hai mujhe bahte hue paani par
main abhi pahle ḳhasare se nahin nikla huun
phir bhi tayyar hai dil dusri nadani par
kisi bhi vaqt badal sakta hai lamha koi
is qadar ḳhush bhi na ho meri pareshani par
ḳhatm hone ko hain ashkon ke zaḳhire bhi ‘jamal’
ro.e kab tak koi is shahr ki virani par
Leave a Reply