Shakeel Badayuni
be-khudi hai na hoshiyari hai
bada-khvari si bada-khvari hai
husn masruf-e-parda-dari hai
jaane ab kis nazar ki baari hai
tu ne dekhi to hogi ai naseh
vo mohabbat jo ikhtiyari hai
kam nahin shorish-e-nafas lekin
zindagi par jumud taari hai
gham-e-ulfat to dil se haar chuka
ab gham-e-zindagi ki baari hai
jis chaman men kabhi na aae bahar
us chaman ki khizan bhi pyari hai
haae vo bada-kash ki jis ne ‘shakil’
zindagi be piye guzari hai
Leave a Reply