Dur Bhi Jate Hue Pas Bhi Aate Hue Hum

Zia Zameer

duur bhi jaate hue paas bhi aate hue ham

bhulte bhulte kuchh yaad dilate hue ham

niind ka is ko nasha ham ko jagane ki havas

ḳhvab men aate hue niind churate hue ham

pahle rote hue apni hi nigahbani men

aur be-saḳhta phir ḳhud ko hansate hue ham

pichhli shab ponchhte ankhon se purane sabhi ḳhvab

agli shab ḳhvabon ka ambar lagate hue ham

charagar bante hue apni hi virani men

pahli barish men akele hi nahate hue ham

ḳhuun armanon ka karte hue ḳhamoshi se

aur phir ḳhuun ko ankhon men chhupate hue ham

apni jholi men kisi jiit ka nashsha sa liye

us ke kuche se ‘ziya’ haar ke jaate hue hain ham