dekh us pari se kijiye kya ab to ja lagi
chhoti hi koi baat hai phir ye bala lagi
us lab pe dekhte hi se vo paan ki dhadi
sham-o-shafaq in ankhon men kab khushnuma lagi
ye dastaras kise ki kare us ko dast-bos
sau minnaton se paanv men us ke hina lagi
main kya kiya ki mujh ko nikale hai vo sanam
ai ahl-e-bazm koi to bolo khuda lagi
goli thi ya khadang thi zalim tiri nigah
chhutte hi dil ko tod kaleje men aa lagi
kis tarah hal-e-dil kahun us gul se baagh men
phirti hai us ke saath to har-dam saba lagi
is dard-e-dil ka puchhiye kis se ilaaj ja
apni si kar chuke pa na koi dava lagi
aaya jo mehrban ho sitamgar tu is taraf
kis vaqt ki na janiye tujh ko dua lagi
itna to vo nahin hai ki ‘bedar’ diije dil
kya jaane pyari us ki tujhe kya ada lagi
Leave a Reply