Shafiq Saleemi
kunj-e-tanha.i basa.e hijr ki lazzat men huun
sab se daman jhaaḌ kar bas ik tiri chahat men huun
kaun sa sauda hai sar men kis ke qaabu men hai dil
har qadam sahraon men hai har ghaḌi vahshat men huun
main anaon ka tha parvarda to phir dast-e-saval
kis tarah phaila kisi ke samne hairat men huun
ye bhi kya bechargi hai kaghzi shadabiyan
apne chehre par saja.e hajla-e-ghairat men huun
ek ḳhvahish ke hazaron rang umr-e-muḳhtasar
kuchh bhi kar paata nahin main is qadar ujlat men huun
ai mire ghar! ab to mujh ko khinch le apni taraf
aur kitni der main is arsa-e-hijrat men huun
Leave a Reply