Rehman Faris
umr-bhar ishq kisi taur na kam ho amin
dil ko har roz ata ne.amat-e-gham ho amin
mere kaase ko hai bas chaar hi sikkon ki talab
ishq ho vaqt ho kaghaz ho qalam ho amin
hujra-e-zat men ya mahfil-e-yaran men rahun
fikr duniya ki mujhe ho bhi to kam ho amin
jab main ḳhamosh rahun raunaq-e-mahfil Thahrun
aur jab baat karun baat men dam ho amin
log chahen bhi to ham ko na juda kar paa.en
yuun miri zaat tiri zaat men zam ho amin
ishq men Duub ke jo kuchh bhi likhun kaghaz par
ḳhud-baḳhud lauh-e-zamana pe raqam ho amin
na Dara paa.e mujhe tirgi-e-dasht-e-firaq
har taraf raushni-e-dida-e-nam ho amin
‘mir’ ke sadqe mire harf ko darveshi mile
duur mujh se havas-e-dam-o-diram ho amin
mere kanon ne suna hai tire baare men bahut
meri ankhon pe bhi thoḌa sa karam ho amin
jab zamin aḳhiri hiddat se pighalne lag jaa.e
ishq ki chhanv mire sar ko baham ho amin
Leave a Reply