husn ka ek aah ne chehra niDhal kar diya
aaj to ai dil-e-hazin tu ne kamal kar diya
sahta raha jafa-e-dost kahta raha ada-e-dost
mere ḳhulus ne mira jiina muhal kar diya
mai-kade men hai qaht-e-mai ya koi aur baat hai
pir-e-mughan ne kyuun mujhe jaam sambhal kar diya
jitne chaman-parast the saya-e-gul men mast the
apna uruj-e-gulistan nazr-e-zaval kar diya
ḳhud mira soz-e-jan-gudaz chheḌ saka na dil ka saaz
aap ki ik nigah ne sahab-e-hal kar diya
bazm men saare ahl-e-hosh un ke sitam pe the ḳhamosh
ek junun-parast ne uTh ke saval kar diya
lutf-e-firaq-e-yar ne lazzat-e-intizar ne
duur dil o nigah se shauq-e-visal kar diya
sun ke bayan-e-mai-kada dekh ke shan-e-mai-kada
shaiḳh-e-haram ne bhi ‘fana’ mai ko halal kar diya
Leave a Reply