musibat thi hamare hi liye kyuun
ye maana ham jiye lekin jiye kyuun
na aana aur phir ilzam dena
ki itne be-asar naale kiye kyuun
pas-e-ḳhum piine men hai kya buzurgi
jo piina hai to phir chhup kar piye kyuun
jo di thi husn men ye dil-farebi
mujhe hosh-o-havas itne diye kyuun
ḳhayal-e-jumbish-e-mizhgan na rakkha
hamare zaḳhm men Tanke diye kyuun
‘aziz’ ilzam deta hai mujhe zabt
na thi tasir to naale kiye kyuun
Leave a Reply