hai ḳhirad-mandi yahi ba-hosh divana rahe
hai vahi apna ki jo apne se begana rahe
kufr se ye iltija.en kar raha huun baar baar
ja.un to ka.aba magar ruḳh su-e-mai-ḳhana rahe
sham-e-sozan kuchh ḳhabar bhi hai tujhe o mast-e-gham
husn-e-mahfil hai jabhi jab tak ki parvana rahe
zaḳhm-e-dil ai zaḳhm-e-dil nasur kyuun banta nahin
lutf to jab hai ki afsane men afsana rahe
ham ko vaa.iz ka bhi dil rakhna hai saaqi ka bhi dil
ham to tauba kar ke bhi paband-e-maiḳhana rahe
aḳhirash kab tak rahengi husn ki nadaniyan
husn se puchho ki kab tak ishq divana rahe
faiz-e-rah-e-ishq hai ya faiz-e-jazb-e-ishq hai
ham to manzil pa ke bhi manzil se begana rahe
mai-kade men ham dua.en kar rahe hain baar baar
is taraf bhi chashm-e-mast-e-pir-e-mai-ḳhana rahe
aaj to saaqi se ye ‘bahzad’ ne bandha hai ahd
lab pe tauba ho magar hathon men paimana rahe
Leave a Reply