agar havaon ke ruḳh mehrban nahin hote
to bujhti aag ke tevar javan nahin hote
dilon pe barf jami hai labon pe sahra hai
kahin ḳhulus ke jharne ravan nahin hote
ham is zamin ko ashkon se sabz karte hain
ye vo chaman hai jahan baghban nahin hote
kahan nahin hain hamare bhi ḳhair-ḳhvah magar
jahan guhar lagao vahan nahin hote
idhar to aankh barasti hai dil dhaḌakta hai
ye sanehat tumhare yahan nahin hote
vafa ka zikr chalaya to hans ke bole vo
fuzul kaam hamare yahan nahin hote
Leave a Reply